Este curso, que se certificará co título de experto en Tecnoloxías cuánticas da información, introducirá ao alumnado nestas novas tecnoloxías que serán imprescindibles nos próximos anos para poder así dar resposta á demanda empresarial que require de profesionais competentes en tecnoloxías cuánticas en Galicia, agora que a comunidade busca converterse nun referente europeo e internacional neste campo.

Trala primeira revolución cuántica, que levou ao desenvolvemento dos láseres e dos semicondutores, actualmente a ciencia está inmersa na segunda revolución cuántica, que quere aproveitar todo o control acadado nas últimas décadas na manipulación de sistemas cuánticos individuais, para mellorar significativamente as tecnoloxías que empregamos para almacenar, procesar e transmitir información.

Entre as principais aplicacións que se albiscan están os computadores cuánticos, que permitirán, entre outras cousas, resolver problemas matemáticos de forma exponencialmente máis rápida que os seus análogos clásicos, simular con precisión sistemas físicos complexos, ou deseñar eficientemente moléculas e fármacos, e as comunicacións cuánticas, que garantirán a absoluta seguridade das comunicacións independentemente da capacidade computacional dun posible atacante.